Digjen 4 banesa në Shkodër, banorët fajësojnë komshiun

Një zjarr i rënë në orët e mesnatës në lagjen “Skanderbeg” në Shkodër ka shkrumbuar 4 banesa, duke shkaktuar dëme të shumta materiale. Fatmirësisht nuk ka pasur të lënduar, ndërsa dyshohet se zjarri fillimisht ka ardhur nga njëra prej banesave dhe më pas ka përfshirë edhe banesat e tjera. Shkaku sipas policisë, ende nuk dihet, edhe pse dyshimet janë tek rrjeti i amortizuar elektrik.

Por ndryshe mendojnë banorët që flakët i përpinë shtëpitë. Njëra prej tyre hedh dyshime tek komshiu ngjitur, për të cilin thotë se punon natën dhe saldon në një objekt pranë shtëpisë së tyre, duke ngritur dyshimet se këto veprime mund të jenë shkaktar të zjarrit.

“Kemi një komshi këtu, do ketë plasur ndonjë oksigjen. Andej e ka bërë ndonjë masë korrenti. Nuk ka bërë asnjë zhurmë. Nuk ka plasur bombola, absolutisht jo. Ky (komshiu) na ka djegur shtëpinë. Çdo gjë është djegur. S’kemi ku të shkojmë. Kur ka rënë zjarri ka qenë burri në banesë. Kjo nuk është prej bombolës. E kemi prej një skizofreni që punon gjithë natën duke salduar. Është djegur çdo gjë, me lavatriçe, divane, rroba, çdo gjë”, tha Luçie Kola

Menjëherë pas rënies së flakëve, në vendngjarje kanë mbërritur zjarrfikëset që kanë bërë të mundur shuarjen e zjarrit dhe vënien nën kontroll të situatës. Policia dhe prokuroria po hetojnë shkaqet që çuan në djegien e 4 shtëpive, njëra prej të cilave e braktisur.

LEXO GJITHASHTU:

• Greqia po “digjet”, Gazetari: 43 gradë do shkojnë sot temperaturat në hije
• Zjarr në Berat, dyshohet të jetë i qëllimshëm. Detajet e para