Digjet banesa në Pogradec, shpëtohet mrekullisht 80-vjeçari nga nipi i tij

Një zjarr i përmasave të mëdha përfshiu një banesë kolektive në lagjen “numër 4” të Pogradecit mbrëmjen e të shtunës. Sipas të dhënave të para dyshohet se shkak i zjarrit ishte djegia e oxhakut të njërës prej banesave, zjarr i cili më pas është përhapur në gjithë godinën duke djegur plotësisht atë, krahas saj janë djegur pjesërisht edhe 3 banesa të tjera.

Gjatë momentit të zjarrit në banesë ka qenë duke fjetur një 80 vjeçar i cili është arritur të nxirret në kohë nga nipi i tij, banorë dhe një polic. Dëmet në banesën e 80 vjeçarit ishin fatale, pasi ajo u dogj plotësisht.

E bija e të moshuarit ka folur nga ana tjetër për situatën dhe dëmet e shkaktuara.

“Dëmi është i madh pasi janë djegur 4 dhoma, 2 korridore. Erdhi zjarrfikësja dhe s’kishte ujë. Janë dy zjarrfikëse dhe zjarri ka shuar të gjithë shtëpinë”, tha ajo.

Fatmir Metoshi 54 vjeç është një banor i lagjes i cili ka ndërhyrë që në momentet e para duke nxjerrë jashtë të moshuarin

Dola në ballkon, lajmërova njerëzit, në atë moment vajta për të shpëtuar të moshuarin, e nxorëm jashtë bashkë me një njëri të tij dhe lajmërova policinë dhe zjarrfikësit

Për fikjen e zjarrit u angazhuan 4 zjarrfikëse, tre të Pogradecit dhe një e Maliqit të cilët punuan për gati 3 orë për shuarjen e zjarrit.

Ndërkohë ajo çfarë u vu re ishte vështirësia e forcave zjarrfikëse për të ndërhyrë pranë zonës si pasojë e ngushtimit të rrugëve nga ndërtimet. Nga ana tjetër zjarrfikësit apelojnë që banorët të cilët ngrohen me lëndë drusore, të pastrojnë oxhaqet të cilët në këtë periudhë janë shkaku kryesor i rënies së zjarreve në banesa.