Dita e 8-të e protestës. Qytetarët mblidhen para Kryeministrisë

Përfaqësues të shoqërisë civile, aktivistë dhe qytetarë janë mbledhur edhe këtë të diele në sheshin “Skënderbej”, nga ku marshuan në bulevardin “Dëshmorët e Kombit” në ditën e 8-të të protestës kundër ndërtimit në Zvërnec.

Me flamuj dhe pankarta në duar, pas marshimit në bulevard, protestuesit u ndalën para godinës së Kryeministrisë ku pritet të qëndrojnë për disa orë siç ka ndodhur në ditët e mëparshme. Protesta nisi me protestuesit të cilët kënduan himnin e Flamurit.

Ata bënë thirrje si: “Shqipëria e shqiptarëve, jo e tradhtarëve”, “Dorëheqje, dorëheqje”. Në protestë janë ngritur edhe qytetarët në Pogradec.

Prej ditësh, qytetarët kanë artikuluar pesë kërkesa kryesore: dorëheqjen e kryeministrit; shfuqizimin e statusit dhe kuadrit ligjor për investitorët strategjikë; shfuqizimin e Paketës së Maleve; anulimin e ndryshimeve në ligjin për Zonat e Mbrojtura; si dhe anulimin e ndryshimeve në ligjin për Trashëgiminë Kulturore.

Protesta në Korçë, Fier dhe Shkodër

Këtë të diele janë zhvilluar protesta edhe në qytete të tjera të vendit përveç se në Tiranë. Mësohet se protestat janë zhvilluar në Shkodër, Elbasan, Korçë dhe Fier.

Në Elbasan mbajt në ditën e saj të tretë, protesta kundër projektit të ndërtimit në Zvërnec. Qytetarë dhe aktivistë u mblodhën në bulevardin kryesor të qytetit, ku bllokuan qarkullimin.

Gjatë protestës, pjesëmarrësit kanë kënduar dhe kanë bërë thirrje që qytetarët të lënë lokalet dhe t’u bashkohen protestës. Qytetarët shprehen se reagimi do të vijojë edhe në ditët në vijim, në kundërshtim të projektit që po kundërshtohet prej tyre.

Për të katërtën ditë radhazi, qytetarët fierakë kanë protestuar në sheshin qendror të Fierit. Me pankarta në duar në fjalën e tyre protestuesit kanë renditur edhe problematikat e qarkut Fier.

Ata kanë kërkuar njëzëri dorëheqjen e qeverisë dhe kryeministrit Rama, teksa u kanë bërë thirrje gjithë qytetarëve ti bashkohen kësaj kauze që i ka ngritur në këmbë mijëra shqiptarë brenda dhe jashtë vendit.

Edhe në Shkodër e Korçë u mblodhëm dhjetëra qytetarë të cilët njoftuan se do të mblidhen prap nesër.

Protestë në Gjirokastër: Shqipëria nuk është në shitje

Qytetarë dhe aktivistë janë mbledhur në sheshin “Çerçiz Topulli” në Gjirokastër, ku kanë zhvilluar një protestë kundër projektit turistik të planifikuar në Zvërnec.

Me flamuj kombëtarë dhe pankarta në duar, pjesëmarrësit kanë shprehur kundërshtimin e tyre ndaj projektit, duke përcjellë mesazhin: “Shqipëria nuk është në shitje!”.

Tubimi në Gjirokastër vjen në vijim të protestave që po zhvillohen prej disa ditësh në Tiranë dhe qytete të tjera të vendit, ku qytetarë dhe përfaqësues të shoqërisë civile kërkojnë mbrojtjen e zonave të mbrojtura dhe më shumë transparencë për projektet zhvillimore.