“Do ta merrni vesh shumë shpejt”-  Murrizi flet pas daljes nga SPAK

Ish-deputeti i Partisë Demokratike, Myslym Murrizi, u paqrait paraditen e kësaj të marte Prokurorinë e Posaçme, ku qëndroi për rreth 45 minuta.

Pas përfundimit të dëshmisë, Murrizi konfirmoi se ishte thirrur në SPAK për një kallëzim që ai kishte bërë, por nuk dha detaje të mëtejshme mbi dosjen në fjalë. Ai shtoi se informacioni lidhur me këtë çështje pritet të bëhet i njohur shumë shpejt.

Murrizi theksoi gjithashtu se kishte shkuar në SPAK me duar në xhepa, pasi nuk ishte një person nën hetim dhe nuk kishte nevojë të merrte me vete materiale shtesë që mund t’i nevojiteshin. Ai e cilësoi këtë si një akt të zakonshëm, duke u shprehur se nuk kishte marrë as kartën e identitetit, pasi nuk kishte pasur nevojë për të.

“SPAK-u ka kryer punë me Myslimin, bashkë me të gjitha prokuroritë e Shqipërisë. Jam i pari që jam hetuar për 10 muaj rresht nga një grusht fëlliqësirash në Policinë e Shtetit. Do ta merrni vesh më vonë. Oficeri më shoqëroi tek një prokuror, të cilin nuk e njoh, nuk ia mora kartën e identitetit, sepse nuk kisha marrë as kartën time me vete. Unë hyra me duar në xhepa, materialet shtesë i kanë ata që hyjnë me dosje. Unë për fatin e keq mbaj mend shumë, nuk kam nevojë për letra. Isha i thirrur si një nga 3.8 milionë votuesit dhe një nga 5 milionë shqiptarët”, deklaroi Murrizi.

LEXONI GJITHASHTU:

• Ish-deputeti Myslim Murrizi paraqitet në Prokurorinë e Posaçme
• Avokati amerikan i Veliaj nuk lejohet të ndjekë procesin në gjykatë si vëzhgues
• Veliaj në Apelin e GJKKO: SPAK ka përgjuar telefonatat me familjarët e mi