Domate dhe miell drejt Ministrisë dhe policëve, 60 minutat e para të protestës për Lear Kurtin

Gazetari i Euronews Albania, Eni Ferhati raportoi 60 minutat e para të protestës së dytë për vdekjen e Lear Kurtit.

Mbledhja e qytetarëve nisi aty ku ishte lajmëruar, para Ministrisë së Brendshme, rreth orës 18:00 dhe u zhvendos para Kryeministrisë.

Ferhati tha se domate dhe miell është përdorur nga protestuesit kundrejt efektivëve të policisë dhe godinës, ndërsa në posterë të ndryshëm, qeveria Rama është cilësuar si “qeveri e drogës”.

“Nuk ka një organizator që mund të identifikohet si ideator i kësaj proteste. Sigurisht që thirrjet e para kanë qenë në rrjetet sociale, por kemi parë dhe persona afër Partisë Demokratike,” – u shpreh gazetari, ndërsa tha se kryetari i bashkisë së Shkodrës, Bardh Spahia ka qenë i pranishëm, si dhe zyrtarë të tjerë të PD-së.

Kërkesat e protestuesve janë për dorëheqjen e ministrit të Brendshëm, Bledi Çuçi dhe kryeministrit Rama për aq kohë sa kjo është ngjarje e përsëritur, duke e lidhur dhe me rastin e Klodian Rashës.

LEXONI GJITHASHTU:

• Protesta për vdekjen e Lear Kurtit zhvendoset drejt Kryeministrisë
• Protesta e dytë për vdekjen e Lear Kurtit para Ministrisë së Brendshme
• Ekskluzive/ Itinerari i Lear Kurtit, nga shoqërimi në polici tek humbja e jetës