Drejtori i projekteve strategjike në Bashkinë Tiranë: PS në 25 vjet ka qenë parti e parë

Rezultati i zgjedhjet parlamentare të 25 prillit ka tejkaluar pritshmëritë e votuesve të Partisë Socialiste, ndërsa Partia Demokratike dhe Lëvizja Socialiste për Integrim zhgënjyen gjysmën apo dhe më shumë të mbështetësve të tyre, të cilët prisnin një performancë më pozitive.

Kjo e dhënë u zbulua nga sondazhi paszgjedhor i kryer nga kompania MRB për Euronews Albania.

Drejtori i projekteve strategjike në Bashkinë e Tiranës, Genci Kojdheli thotë se Partia Socialiste në 25 vjet ka dëshmuar se është partia më e votuar në nivel kombëtar.

“Unë nuk besoj se ne duhet të gjykojmë një sistem elektoral sot, duke harruar dy parakushte. PS është forcë e parë në 25 vjet. Ky realitetit nuk ndryshon. Edhe kur ka fituara kombinimi LSI-PD,  edhe kur në Shqipëri bëhej dushku, në 2009 dhe në 2013, forcë e parë ishte PS”, tha ai.

Duke komentuar të dhënat në studion e “Barometri Politik”, z. Kojdheli thekson se gjetjet e sondazhit pas zgjedhjeve dëshmojë faktin, që Partia Socialiste vijon të jetë partia më e pëlqyer nga shqiptarët.

“Legjitimon atë që sondazhi ka thënë që nga janari deri në ditën e zgjedhjeve që forcë e parë është PS. Sa i takon LSI, doja të thoja vetëm një gjë, pritshmëria ishte shumë e madhe, sepse aksesi që ka pas LSI në zgjedhjet e fundit në 2017 ishte shumë i madh në parlament dhe nuk pritej rënie drastike”, tha ai.