Drejtori i Qendrës për Inovacion në Kosovë: Qeveria e re duhet të ketë fokus punësimin e të rinjve

Dy njohësit dhe ekspertët e ekonomisë së Kosovës, Arjan Zeka drejtori i Odës Amerikane Ekonomike në Kosovë dhe Uranik Begu drejtori  i Qendrës për Inovacion në Kosovë, shprehen se vendi ka nevojë të fokusohet te një shtyllë e ekonomisë dhe të investojë te ajo dhe kështu të bëhet lider në rajon.

“Në fakt nuk dua të komentoj pozicionimin e partive politike. Parakusht për zhvillim ekonomike duhet të jetë zbatimi i ligjit. Duhen thithur investime nga jashtë. Fokus duhet të jetë dhe lufta kundër korrupsionit. Duhet investuar edhe për të rinjtë, për punësimin e tyre”, – thotë zoti Begu.

“Premtimet ambicioze gjatë fushatave nuk kanë pasur një sqarim më të detajuar për burimet e tyre. Nuk ka ndodhur asnjë investim apo të hapen shumë vende pune. Investimet nga diaspora nuk janë të mjaftueshme, por duhet edhe investime nga brenda”, – thotë z. Zeka.

Nga ana e tij, z. Begu tregon për Balkan Talks se çfarë fokusi ka institucioni që ai drejton.

“Fokusi ynë është që të krijohet një strukturë që ka fokus zhvillimin e teknologjisë. Ka nevojë për një profil ekonomik dhe Kosova të jetë lider në një fushë ekonomike. Mendoj që duhet të jetë fusha e zhvillimit teknologjik dhe IT-së”, – thotë drejtori i Inovacionit.

Ndërsa z. Zeka shprehet se duhet menduar për të rinjtë dhe punësimin e tyre nga qeveria e Kosovës.

“Do duhet të ishte fokus punësimi I të rinjve, por realiteti nga e kaluara tregon që mund të mos jetë kështu. 

Ka një paradoks, që ende pa përfunduar zgjedhjet flitet për zgjedhjet e reja pas këtyre, nëse dështon zgjedhja e presidentit”, – thotë drejtori i Odës Amerikane.