Drogoi dhe abuzoi për disa vite me partneren, truproja kishte kontakte online me Dominique Pelicot

Një truproje nga Lioni do të dalë në gjyq për dyshimin se ka droguar dhe përdhunuar partneren e tij. Nga hetimet ka rezultuar se ka pasur komunikim në internet me Dominique Pelicot, i cili u dënua për drogim dhe përdhunim të gruas së tij, Gisele Pelicot.

Pelicot, një nga shkelësit më të këqij seksualë në historinë moderne franceze, po vuan 20 vjet burg pasi u shpall fajtor për drogimin e ish-gruas së tij dhe ftimin e dhjetëra burrave për ta përdhunuar atë në shtëpinë e tyre në jug të Francës për gati një dekadë. Ai dhe 50 burra të tjerë u shpallën fajtorë pas gjyqit më të madh për përdhunim në historinë franceze në vitin 2024.

73-vjeçari mësohet se ishte pjesë e një grupi online të quajtur “Kundër dijenisë së saj”. Ai akuzohet se hodhi ilaçet e gjumit dhe kundër ankthit në ushqimet dhe pijet e ish-gruas së tij për ta lënë atë të humbte ndjenjat.

Gisele Pelicot fitoi mbështetje në mbarë botën pasi këmbënguli që gjyqi për përdhunim të mbahej publikisht për të rritur ndërgjegjësimin për përdorimin e drogës dhe qetësuesve për përdhunimin e grave, duke thënë: “Nuk është për ne të kemi turp, është për to”.

Burri që doli në gjyq të enjten punonte si truproje ndërkombëtar për klientë të profilit të lartë në festivale filmi dhe në udhëtime anembanë botës, përfshirë SHBA-në dhe shtetet e Gjirit.

Hetuesit gjetën komunikime midis tij dhe Pelicot si pjesë e hetimeve të tyre fillestare ndaj Pelicot në vitin 2020.

Burri, i cili u arrestua në vitin 2023, akuzohet për drogimin, përdhunimin dhe filmimin e saj. Avokati i tij, Gabriel Versini-Bullara, tha se ai i mohoi akuzat.

Partnerja e burrit u tha hetuesve se kishte përjetuar “lodhje të madhe” gjatë një periudhe trevjeçare pa e kuptuar arsyen. Ajo foli gjithashtu për probleme me zemrën, marramendje dhe disa humbje të vetëdijes.

Truproja pranoi akuza të veçanta për posedim dhe shpërndarje të imazheve të abuzimit me fëmijë.