Dronët rus në Poloni, Zelensky: Një paralajmërim për Evropën

Presidenti i Ukrainës, Volodymyr Zelensky, ka reaguar ashpër pas incidentit të fundit me dronë rusë në hapësirën ajrore të Polonisë, duke e cilësuar atë si një “paralajmërim për të gjithë Evropën”.

Në një postim në Telegram, Zelensky theksoi se “kushdo që dëshiron t’i japë fund kësaj lufte duhet të bëjë atë që është e nevojshme për të ndaluar makinën ruse të luftës”. Ai kërkoi hapa të fortë nga Shtetet e Bashkuara dhe vendet e tjera partnere, duke përfshirë politika më të ashpra sanksionesh dhe tarifash kundër Rusisë.

“Të gjithë e shohin se lufta e Rusisë kundër Ukrainës është lufta e Putinit. Dronët rusë kundër Polonisë janë gjithashtu lufta e Putinit. Dhe ky është një paralajmërim jo vetëm për polakët, por për të gjithë në Evropë. Dronët rusë mund të mbulojnë distanca shumë më të mëdha”, tha ai.

Presidenti ukrainas u bëri thirrje vendeve perëndimore që të mos kërkojnë më justifikime për të mos vendosur masa të reja ndëshkuese ndaj Kremlinit. Ai iu drejtua drejtpërdrejt vendeve të BE-së, SHBA-së, G7 dhe G20 për të rritur presionin ndaj Moskës.

“Paqja është rruga. Rruga që duhet të ndjekim nga lufta në paqe. Të gjithë duhet ta ndjekin këtë rrugë dhe sanksionet janë pjesë e saj. Nëse Putini nuk dëshiron paqe, ne duhet ta detyrojmë të bëjë paqe. Lufta e Putinit do të mbarojë kur ai – po, ai – nuk do të jetë në gjendje ta vazhdojë më atë”, përfundoi Zelensky.