Dueli i madh i së martës, Barcelona-Atletico Madrid luftë për kreun e La Liga

Barcelona-Atletico Madrid është kryendeshja e kësaj të marte në kampionatin spanjoll, një duel që luhet drejtpërdrejt për kreun.

Dy skuadrat po kalojnë një formë të mirë, ndërsa diferenca mes tyre është vetëm 3 pikë.

Vëmendja e gjithë Evropës këtë të martë është në Camp Nou, aty ku zhvillohet një përplasje mes Barcelonës vendëse dhe Atletico Madrid, dy ekipe të cilat po ashtu kanë një rivalitet historik me njëra-tjetrën, edhe pse jo në përmasat e El Clasico.

Një ballafaqim që bëhet edhe më emocionues pasi bëhet fjalë për kreun e La Liga, që aktualisht mbahet nga katalanasit, ndërsa Los Colchoneros janë në vendin e 4, me 3 pikë më pak.

Në 5 ndeshjet e fundit këtë sezon në La Liga, të besuarit e Diego Simeone kanë marrë 15 pikë, ndërsa Barcelona 12, pasi ka humbur në El Clasico me Realin.

Blaugranët cilësohen favoritë për marrjen e 3 pikëve, mjaft të rëndësishme në këtë fazë të garës, ku diferencat mes ekipeve janë shumë të vogla.

Në 5 duelet e fundit direkte mes tyre, Barcelona ka fituar 4 herë, ndërsa 1 sfidë u fitua nga madrilenët në dhjetor të shkuar.

Yjet në fushë nuk do të mungojnë, ku mund të përmendim emra si Yamal, Lewandowski, Pedri apo Raphinha.

Atletico po ashtu nuk mbetet pas, me një yll në majën e sulmit si Alvarez, por edhe Griezmann, Nico Gonzalez, Sorloth e të tjerë.