“Duke përshëndetur luftëtarët e lirisë”, Berisha ndan videon nga arresti i shtëpisë

Disa dhjetëra mbështetës të Berishës u grumbulluan te rrugica “Mustafa Matohiti” mëngjesin e sotëm në mbështetje të Berishës që kryen aty arrestin në shtëpi.

Brohoritjeve të mbështetësve të tij dhe ovacioneve, Berisha iu përgjigj duke dalë në dritaren e tij, duke i përshëndetur me dy gishta.

“Duke përshëndetur luftëtarët e lirisë në betejën e tyre pa kthim kundër diktaturës së drogës, krimit e korrupsionit”, shkroi Berisha në një postim në Facebook të shoqëruar me një video.

Dy ditë më parë Gjykata e Posaçme pranoi kërkesën e SPAK për shtrëngimin e masës së sigurisë për ish-kryeministrin i dyshuar për kryerjen e veprës penale “korrupsion pasiv i funksionarëve të lartë shtetërore ose të zgjedhurve vendorë”, kryer në bashkëpunim në aferën e privatizimit të ish kompleksit Partizani.

Sali Berisha urdhërohet të mos largohet nga banesa ku do të jetë me mbikqyrje periodike policore dhe duhet të ketë kontakt vetëm me personat që jetojnë me të në të njëjtën banesë. Gjithashtu i ndalohet komunikimi me persona që nuk janë familjarë.

LEXONI GJITHASHTU:

• Mbështetësit i shkojnë poshtë pallatit, Berisha i përshëndet nga dritarja
• Në arrest shtëpie, Berisha uron Vitin e Ri: Shqipëria u gdhi sot si Bjellorusia