Dumani: Duhet riparë kufiri monetar i korrupsionit që heton SPAK

Kreu i Prokurorisë së Posaçme, Altin Dumani, paraqiti në Këshillin e Lartë të Prokurorisë raportin e punës së SPAK për vitin 2023.

Dumani tha se gjatë vitit të shkuar Prokuroria e Posaçme ka pasur një rritje cilësore të punës së saj, ndërsa vlerësoi si shumë të mirë bashkëpunimin me agjencitë e huaja partnere.

Ai theksoi se duhet të ketë një ndryshim ligjor, në mënyrë që të rritet kufiri monetar për hetimin e korrupsionit, për të lehtësuar punën e SPAK që është e ngarkuar me çështje.

“Ky kufi monetar që kemi nuk më duket i arsyeshëm, e shoh si emergjent. I takon ligjvënësit, por duhet të jetë shumë herë më i lartë, ndoshta 500 mijë lekë jo 50 mijë sa është aktualisht. Në rastet kur ka korrupsion mbi 50 mijë lekë të hetohen nga SPAK, ndërsa poshtë këtij kufiri të hetohet nga Prokuroritë e zakonshme. Kjo vlen që puna e SPAK të mos ngarkohet”, tha Dumani.

Dumani theksoi se vëmendje e veçantë gjatë 2023 në punën e SPAK i është dhënë hetimit të produkteve të veprës penale.

“Vlera e pasurive konfiskuara e sekuestruara mbërrin një vlerë në total prej 41 mln euro, nga të cilat 54 % të sekuestruara, pjesa tjetër të konfiskuara. 221 procedime penale për korrupsion, 67 procedime janë nisur kryesisht nga SPAK, 139% më shumë se viti paraardhës. Ka një total pre 90% të numrit të përgjimeve. Ka një rritje me 95% të kërkesave për ndihmë juridike nga vendet e huaja. Gjatë vitit 2023 janë regjistruar 299 procedime të reja. 8 procedime penale me 18 të pandehur për zyrtarë të nivelit të lartë, ish-ministra, ish-kryeministra, ish-kryebashkiakë, apo ish-sekretarë të përgjithshëm”, ishin disa nga shifrat e renditura nga Dumani.

LEXONI GJITHASHTU:

• Basha: Pazar anti-SPAK me amnistinë, do përfitojnë zyrtarët e korruptuar
• SPAK zbardh takimin e ndihmës sekretarit amerikan me Altin Dumanin