Dumani jep opsionin e tij për statusin e prokurorëve të SPAK pas mandatit 9-vjeçar

Duke raportuar punën për vitin 2024 në KLP, kreu i SPAK, Altin Dumani, foli edhe në lidhje me çështjen e statusit të prokurorëve të SPAK dhe çfarë do të ndodhë me ta pas përfundimit të afatit 9-vjeçar.

Dumani tha se ai ishte pro rikandidimit të çdo prokurori të SPAK pas përfundimit të këtij mandati, ndërsa theksoi se të qenit pro këtij varianti nuk do të thotë se është për rinovimin automatik të mandatit.

“Çështjen e statusit dhe fatin e prokurorëve ne e diskutojmë së bashku me kolegët. Unë nuk kam deklaruar kurrë apo propozuar ndonjë ndryshim pa u konsultuar me të gjithë prokurorët dhe kemi shkuar drejt një mendimi unanim të të gjithëve. Ne kemi propozuar jo rinovim automatik të mandatit, që do të thotë se në përfundim të afatit 9-vjeçar, prokurori të mos riemërohet automatikisht pa garë. Propozimi është që të bëhet ndryshim kushtetues, që prokurorëve në përfundim të mandatit t’u jepet mundësia për të rikandiduar, që do të thotë të rikandidojnë me prokurorë të tjerë. Kështu bëhet e mundur edhe vijueshmëria e institucionit. Kuptohet, për ata që duan ta vazhdojnë, ndërkohë që normalisht do ketë edhe nga ata që nuk duan të vazhdojnë më tej.”

Ai tha se në përfundim të mandatit 9-vjeçar, nëse prokurori do të dëshirojë të rikandidojë, do të ishte nën filtrin e Këshillit, i cili, duke parë punën e këtij prokurori, mund ta riemëronte ose jo, në bazë të performancës së tij.

“Dhe është një mundësi e mirë që prokurorët e SPAK, në përfundim të mandatit, të rikandidojnë, por t’u thuhet: ‘Faleminderit për këto nëntë vjet, por ne si Këshill ju themi që performanca juaj nuk është e tillë sa për ta rinovuar përsëri kontratën për të vazhduar funksionin në SPAK’. Ndërsa varianti i dytë, ashtu siç ju e thatë, është që prokurorët e Prokurorisë së Posaçme të kenë mundësinë që, në përfundim të mandatit 9-vjeçar, të atashohen në Prokurorinë e Apelit. Unë jam për variantin e parë: që prokurorëve të SPAK, në përfundim të mandatit 9-vjeçar, t’u jepet mundësia të rikandidojnë për një mandat të ri, por theksoj: jo të riemërohen. Jemi kundër riemërimit automatik dhe pro rikandidimit”, tha Dumani.

LEXONI GJITHASHTU:

• Dumani: Pranimi i 40 hetuesve të rinj në BKH u shty në pritje të godinës së re
• Raporti vjetor i SPAK, Dumani: Kemi shënuar arritje, 33 zyrtarë të lartë nën hetim