Dumani: SPAK është institucioni më i kontrolluar në Shqipëri!

Teksa u diskutua mbi analizën e performancave të Institucioneve të Posaçme në vitin 2024, Altin Dumani tha se SPAK kontrollohet nga Gjykatat dhe Këshilli i Lartë i Prokurorisë dhe kjo aplikohet njësoj dhe me prokurorë të tjerë, duke e bërë kështu SPAK-un institucionin më të monitoruar në vend sipas Dumanit.

“Në raport me SPAK, ne si institucion jemi më i monitoruari dhe i kontrolluari në vend. Jemi karshi çdo shkelje të mundshme të ligjit, kemi hetuar dhe hetojmë njëri tjetrin.

Ne kontrollohemi nga të gjitha Gjykatat, nga Këshilli i Lartë i Prokurorisë, kontrollohemi nga Inspektoriati i Lartë i Drejtësisë. Ky kontroll aplikohet njësoj si për çdo prokuror të Prokurorisë së Juridiksionit të Përgjithshëm, e njëjta bazë ligjore aplikohet dhe me prokurorët e Prokurorisë së Posaçme.

Dumani shton se gjatë ecurisë së punës të SPAK, ata raportojnë në Kuvend mbi çdo problematikë, prandaj dhe Kuvendi ka hapësirë të kontrollojë punën e tyre.

“Ne raportojmë në Kuvend mbi ecurinë e institucionit duke dhënë një panoramë të plotë të problematikave të hasura. Gjithashtu propozojmë si mund të zgjidhen këto problematika. Kuvendi po ashtu ka mundësi të kontrollojë punën e SPAK.

Nisur nga miratimi i strategjive, hetimet financiare, kemi përmbushur pothuajse të gjitha rekomandimet e Kuvendit. Jemi institucioni më i kontrolluar në Shqipëri”, tha kreu i SPAK.

LEXONI GJITHASHTU:

• “Përpjekja për ta nxjerr SPAK si represiv, e dështuar”, Dumani: Shikoni shifrat
• Dumani: Asnjë lloj ndikimi i jashtëm nuk do cënojë forcën tonë hetimore