Durrës, 32 familje kundërshtojnë vendimin e gjykatës: Po na nxjerrin nga shtëpitë

Prej më shumë se tre dekadash, 32 familje banojnë në vilat numër 36 dhe 38 në zonën e Plazhit në Durrës.

Ata kundërshtojnë vendimin e Gjykatës së Shkallës së Parë, e cila kërkon që banorët të largohen nga banesat e tyre, pasi godina tashmë është privatizuar nga pronari i truallit dhe nuk konsiderohet më pronë e bashkisë.

Sipas banorëve, ata janë sistemuar në këto godina nga Bashkia e Durrësit dekada më parë dhe gëzojnë statusin e të pastrehëve. Ligjërisht, bashkisë i takon detyrimi për t’u siguruar strehim këtyre familjeve përpara se të shesë pronën ku ata banojnë.

“Ne nuk kemi ku të shkojmë. Bashkia na ka strehuar vetë këtu dhe tani duan të na nxjerrin jashtë, pa na ofruar një zgjidhje tjetër,” – shprehen banorët, të cilët kanë dorëzuar ankim në Gjykatën e Apelit.

Çështja pritet të shqyrtohet në ditët në vijim, ndërsa banorët kërkojnë ndërhyrjen e institucioneve për të mos mbetur në rrugë.

Sipas dokumenteve zyrtare, më datë 20.09.2012 Ministria e Financave dhe Bashkia Durrës ia kanë shitur vilat 36 dhe 38 shtetasit Mikel Noçka, i cili tashmë kërkon lirimin e plotë të objekteve nga familjet që banojnë aty.

LEXONI GJITHASHTU:

• Hiqej si drejtor, si u zbulua i riu që u jepte urdhra policëve në Portin e Durrësit
• PAMJE/ Reshjet sjellin përmbytje në Durrës, qyteti zgjohet nën pushtetin e ujit