Durrës, policia intensifikon kontrollet për nivelin e zhurmave në zonat turistike

Policia e Durrësit ka nisur kontrollet në terren për monitorimin e nivelit të zhurmave në zonat turistike të qytetit, në kuadër të masave për garantimin e sigurisë publike gjatë sezonit turistik veror.

Sipas policisë, në vijim të fushatës sensibilizuese janë zhvilluar takime informuese me administratorë dhe pronarë subjektesh, kryesisht në zonat turistike, aktivitetet e të cilëve gjenerojnë zhurma nga muzika.

Gjatë ditëve të fundit, strukturat e sigurisë publike të Komisariatit të Policisë Durrës kanë organizuar grupe kontrolli në terren, bazuar në hartëzimin e zonave me ndotje akustike. Në kuadër të këtyre kontrolleve janë kryer matje të nivelit të zhurmës në ambiente të hapura dhe të mbyllura, me qëllim verifikimin e respektimit të kufijve të lejuar ligjorë.

Policia bën të ditur se matjet janë realizuar sipas procedurave standarde dhe kanë rezultuar brenda niveleve të lejuara, të përcaktuara në ligjin “Për administrimin e zhurmës në mjedis”, i ndryshuar.

Paralelisht me monitorimin e ndotjes akustike, uniformat blu kanë ushtruar kontrolle edhe për respektimin e orarit të lejuar për transmetimin e muzikës në ambiente të hapura, në zona apo qendra të banuara. Sipas rregullave në fuqi, muzika në këto ambiente lejohet të transmetohet nga ora 11:00 deri në orën 24:00.

Policia e Durrësit ka theksuar se kontrollet do të vijojnë gjatë gjithë sezonit turistik, me qëllim garantimin e qetësisë publike dhe respektimin e standardeve ligjore nga subjektet që ushtrojnë aktivitet në zonat turistike.