Durrës, pronarja akuzon firmën ndërtuese se i ka plaçkitur banesën

Derë e hapur me forcë, shtëpi e kthyer përmbys, punime të parealizuara dhe sende që mungonin, kjo është ajo çfarë pa Valbona Domi, kur u kthye në banesën e saj të dëmtuar nga tërmeti, pasi i dha çelësat kompanisë së caktuar për rikonstruksionin e objektit.

Valbona dhe nëna e saj kanë denoncuar në polici përgjegjësin e punimeve, Viktor Becin, pasi më datë 10 maj i kanë dorëzuar atij çelësat e shtëpisë së tyre.

“Pse ti duhet të më kërkosh mua çelësin e apartamentit tim, ndërkohë që ti e more për të më shkatërruar shtëpinë? Nuk ka aty brenda asnjë lloj punimi, vetëm dera ishte shkatërruar, shtëpia ishte e vjedhur dhe sirtarët ishin të gjitha të hapura”, thotw denoncuesja Valbona Domi.

“Shumë sende personale, përveç atyre të mia, rroba, këpucë, janë edhe sende të familjes. E kemi denoncuar rastin në polici. Erdhi oficerja e policisë gjyqësore, mori të dhënat, është bërë deklarimi në prokurori dhe tani ne presim përgjigje”, shprehet ajo.

Përgjigje po pret edhe i akuzuari për ngjarjen, i cili dha një prononcim për Euronews Albania.

“Kjo çështje ka shkuar në duart e policisë. Kaq. Sqarimet i kam bërë të gjitha në polici. Policia të veprojë të nxjerrë atë keqbërës që e ka bërë, nëse e ka bërë. Çdo gjë është në dorën e policisë”, u shpreh Viktor Beci, përgjegjës i punimeve.

Në përgjigje të interesit të Euronews Albania, policia e Durrësit konfirmon se ngjarja është referuar si vepër penale “Vjedhje” dhe se materialet i janë dorëzuar Prokurorisë.

Kjo e fundit vijon hetimet.

LEXONI GJITHASHTU:

• Turistët nga Kosova braktisin Durrësin pas liberalizimit të vizave
• Siguria në plazhe, njësia detare bllokon dy jet ski pa dokumente në Durrës