Durrës/ Tentativë vrasje me automjet, shpallet në kërkim 40-vjeçari nga Shijaku

Një ngjarje e rëndë është regjistruar mbrëmjen e 24 shtatorit në qytetin e Durrësit, ku një 55-vjeçar mbeti rëndë i plagosur pasi u godit nga një automjet në lëvizje, në rrugën “Vala e Detit”. Drejtuesi i mjetit u largua menjëherë nga vendi i ngjarjes.

Sipas burimeve zyrtare nga Policia e Durrësit, pas hetimeve intensive, është bërë i mundur identifikimi i autorit të dyshuar të ngjarjes. Bëhet fjalë për shtetasin A. B., 40 vjeç, lindur dhe banues në Shijak, i cili dyshohet se ka qëlluar me makinë qëllimisht viktimën, shtetasin A. K., alias B. K., 55 vjeç.

Policia e ka shpallur në kërkim 40-vjeçarin, ndërkohë që janë intensifikuar kontrollet për kapjen e tij si dhe për sekuestrimin e automjetit tip “Mercedes-Benz”, që dyshohet se është përdorur në ngjarje.

I plagosuri është transportuar në gjendje të rëndë në Spitalin e Traumës në Tiranë, ku po merr ndihmën e specializuar mjekësore.

Ngjarja po hetohet si “Vrasje me paramendim”, mbetur në tentativë. Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Durrës për veprime të mëtejshme.

LEXONI GJITHASHTU:

• 51-vjeçari në Durrës u godit 20 herë me thikë, dyshohet për lidhje intime me autorin
• Vrasja e 51-vjeçarit në Durrës, dëshmia e autorit: Beqiraj tentoi të më përdhunonte