Durrësi s’ka mjete motorike të licencuara në fushën e turizmit, thotë zyrtari

Drejtori i Agjencisë Rajonale të Bregdetit në Durrës, Shpëtim Çiku tregoi se konkretisht në Durrës nuk ka mjete lundruese motorike që janë të licencuara në fushën e turizmit, ndryshe nga jugu që ka specifika të tjera.

Zyrtari sqaroi se në regjistrin detar nuk ka asnjë mjet të regjistruar të tipit anije, motoskaf etj, që shërben për transport turistësh.

Sa i takon sigurisë së pushuesve, Çiku u shpreh se ka nisur monitorimi dhe inspektimi i gjithë subjekteve që kanë një kontratë stacion plazhi për t’u siguruar që përmbushin gjithë kriteret.

Ai tregoi se në plazhin e madh në Durrës janë rreth 300 subjekte, një pjesë e mirë e tyre të pajisura me pikë vrojtimi, roje bregdetare dhe mjetet e duhura të shpëtimit.

Pyetur nga gazetarja Loneta Progni për një shifër të saktë, Çiku nuk deklaroi asnjë. Ai u shpreh se vetëm 10-15 për qind e subjekteve mund të mos i përmbushnin të gjitha kriteret.

Ndër të tjera, ai bëri thirrje që edhe njerëzit të ndërgjegjësohen dhe t’i binden më shumë urdhrit të vrojtuesit të plazhit në mënyrë të mos rrezikojnë të futen në det kur kushtet janë të këqija.

LEXONI GJITHASHTU:

• Mësuesi që punon si vrojtues plazhi shpëton jetë prej 6 vitesh