Dy deputetët e PS-së që nuk votuan tre projektligje të buxhetit 2026

Në një seancë maratonë, parlamenti miratoi në parim buxhetin e vitit 2026 me 83 vota pro të maxhorancës dhe 32 kundër të opozitës.

Një detaj i veçantë ishte se dy deputetë të PS-së, Erion Braçe dhe Vullnet Sinaj, nuk morën pjesë në votim për tre projektligje të paketës fiskale, konkretisht:

Erion Braçe nuk votoi për projektligjin: “Për disa shtesa në ligjin nr. 9632, datë 30.10.2006, ‘Për sistemin e taksave vendore’, të ndryshuar”; Votimi: 82 pro, 32 kundër (Braçe nuk votoi).

Ndësa Vullnet Sinaj nuk votoi për dy projektligjet e tjera të paketës fiskale, “Për marrëveshjen e paqes fiskale” – Votimi: 82 pro, 32 kundër (Sinaj nuk votoi) si dhe “Për fshirjen, shuarjen dhe pagesën e detyrimeve tatimore ndaj administratës tatimore qendrore e të detyrimeve të pagueshme në doganë”; Votimi: 82 pro, 30 kundër (Sinaj nuk votoi).

Pikat kryesore të këtyre projektligjeve:

Projektligji “Për sistemin e taksave vendore” përjashton nga taksa e ndikimit në infrastrukturë të gjitha investimet e financuara nga buxheti i njësive të qeverisjes qendrore dhe vendore, si dhe ndërtime për qëllime publike në arsimin, shëndetësinë dhe mbrojtjen sociale.

Projektligji “Për fshirjen, shuarjen dhe pagesën e detyrimeve tatimore ndaj administratës tatimore qendrore e të detyrimeve të pagueshme në doganë” parashikon faljen e rreth 500 milionë euro detyrime dhe gjoba të papaguara nga bizneset deri më 31 dhjetor 2014. Po ashtu, lehtësohen detyrimet e krijuara nga 2015 deri në 2024, me kusht që një pjesë e borxhit të paguhet brenda vitit 2026.

Projektligji “Për marrëveshjen e paqes fiskale” propozon një marrëveshje maksimum 3-vjeçare me bizneset me xhiro mbi 14 milionë lekë. Sipas modelit, mbi fitimin e deklaruar do të shtohet një marzh 18%, dhe çdo fitim që tejkalon këtë prag do të tatohet me 5%. Praktikisht, një biznes me fitim 15 milionë lekë do të ketë një shtesë prej 2.7 milionë lekësh, duke e çuar fitimin në 17.7 milionë lekë, i cili do të tatohet me 15%, ndërsa çdo lekë mbi 17.7 milionë do të tatohet me 5%. Ky është favor për bizneset e mëdha, që aktualisht çdo fitim e tatojnë me 15%.

LEXONI GJITHASHTU:

• Parlamenti miraton në parim buxhetin 2026 me 83 vota pro, opozita voton kundër
• REPLIKAT/ Malaj: Të ardhurat për frymë janë rritur 30 %, Tabaku: Po gënjen