Dy të shoqëruar pas incidentit në protestë, të rinjtë çanë kordonin e policisë

Dy persona janë shoqëruar me forcë nga punonjësit e policisë, pasi çanë kordonin e policisë, që ishte vendosur para Kryeministrisë, në protestën e opozitës, të thirrur nga Partia Demokratike.

Gazetari i Euronews Albania, Eni Ferhati tha për emisionin “Review”, se bëhet fjalë për dy të rinj, identiteti dhe mosha e të cilëve nuk bëhet e ditur.

Ferhati theksoi se gjithashtu, ende nuk dihet nëse ndaj tyre do të ngrihet një akuzë.

Pas më shumë se dy orësh, përfundoi protesta kombëtare e opozitës. Në protestë pati 20 folës, ndër to kryedemokrati, Sali Berisha dhe kreu i Partisë së Lirisë, Ilir Meta.

Të dy liderët, hodhën akuza në drejtim të kryeministrit Edi Rama, për shpopullimin e vendit, situatën ekonomike dhe korrupsionin.

Protesta, pas përfundimit të saj, u shoqërua me incidente. Gjithçka filloi pasi Berisha mbaroi fjalën e tij dhe protestuesve iu bë thirrje për të ndezur qirinj në shkallët e Kryeministrisë, në nder të personave që kanë humbur jetën në përplasjet me policinë.

Protestuesit çanë kordonin e policisë dhe hynë në oborrin e Kryeministrisë, ku hodhën bojë në dyert dhe dritaret e godinës.

LEXONI GJITHASHTU

• Përfundon protesta: Berisha-Meta akuza Ramës, protestuesit çajnë kordonin e policisë
• Protestuesit hedhin bojë në dritaret dhe muret e Kryeministrisë
• Berisha valëvit flamurin kombëtar pas përfundimit të protestës