Dy të vdekur nga bombardimet ruse në Odessa dhe Zaporizhia

Autoritetet njoftuan të hënën se sulmet nga bombardime ruse në Odessa dhe Zaporizhia vranë dy persona.

Një grua “fatkeqësisht humbi jetën” dhe tre persona të tjerë u “plagosën” në Zaporizhia, tha komandanti i distriktit ushtarak Ivan Fedorov. Midis të plagosurve ishte një djalë 11-vjeçar, shtoi ai.

Homologu i tij në Odessa, Oleh Kiper, njoftoi se një person humbi jetën dhe tre të tjerë u plagosën në një sulm rus me një raketë balistike të tipit Iskander, vonë dje, të dielën në mbrëmje.

Sipas zyrtarit, automjetet dhe një rezervuar karburanti u përfshinë nga flakët pas sulmit ndaj asaj që ai e përshkroi si një ndërmarrje bujqësore në rajonin e Odesës.

Rusia ka bombarduar Ukrainën çdo ditë që nga shpërthimi i luftës në shkurt të vitit 2022. Nga ana e saj, Kievi gjithashtu ka intensifikuar sulmet ajrore kundër territorit rus kohët e fundit.

Autoriteti rus i aviacionit civil njoftoi në orët e para të mëngjesit të sotëm se kishte mbyllur katër aeroportet që i shërbenin Moskës, mes raportimeve për shkatërrimin e gati 60 sistemeve ajrore pa pilot ukrainase në rreth dy orë.