Dyshohet se i drejtoi lazerin helikopterit të Trump, si u arrestua 33-vjeçari

Një burrë i akuzuar se drejtoi një tregues lazeri drejt helikopterit presidencial amerikan Marine One, ndërsa Donald Trump ishte në bord, është arrestuar për një akuzë penale federale.

Jacob Samuel Winkler, 33 vjeç, nga Uashingtoni, akuzohet për drejtimin e rrezes së lazerit drejt një aeroplani, një krim i dënueshëm me një dënim maksimal prej pesë vjetësh burgim.

Marine One ishte në ajër të shtunën pranë Shtëpisë së Bardhë kur një oficer patrullimi i Shërbimit Sekret të SHBA-së vuri re Winklerin duke ecur në trotuar, lakuriq dhe duke folur me vete, sipas një deklarate të shkruar nga agjenti.

Oficeri tha se i drejtoi një dritë dore Winklerit, i cili me sa duket reagoi duke i drejtuar një rreze lazeri të kuqe në fytyrën e oficerit.

Ndërsa Marine One fluturonte sipër, Winkler ngriti kokën dhe e drejtoi treguesin me lazer drejt helikopterit, sipas oficerit.

Pasi oficeri e prangosi, Winkler foli vazhdimisht për t’i kërkuar falje presidentit të SHBA-së, thuhet në deklaratë me betim.

Dosja gjyqësore nuk përmend nëse dikush në helikopter e vuri re lazerin por oficeri thekson se sjellja e Winkler mund ta kishte verbuar ose çorientuar përkohësisht një pilot, duke e vënë Marine One në rrezik përplasjeje ajrore me avionë të tjerë në zonë, sipas Prokurores së SHBA-së, Jeanine Pirro.

“Kjo sjellje rrezikon Marine One dhe të gjithë në bord,” tha Pirro në një deklaratë. “Nëse përfshiheni në këtë akt, do të identifikoheni dhe do të ndiqeni penalisht në masën më të plotë të ligjit.”

Winkler u tha hetuesve se e kishte drejtuar lazerin “në të gjitha llojet e gjërave, të tilla si shenjat e ndalimit”, dhe nuk e dinte se nuk mund ta drejtonte atë drejt Marine One, sipas deklaratës me betim.

Hetuesit gjetën gjithashtu një thikë të vogël në posedim të tij, tha oficeri.

LEXONI GJITHASHTU:

• Hamasi letër Trump-it, zbardhet propozimi për armëpushim
• VIDEO/ Policia e SHBA “ndalon” presidentin francez, Macron telefonon Trumpin