E fshehur mes bagëtive, kapet 4.5 tonë kokainë në anijen e nisur nga Kolumbia

Policia spanjolle ka sekuestruar 4.5 tonë kokainë me vlerë 105 milionë eurosh, pasi ka bastisur një anije bagëtish në ujërat e ishujve Kanarie.

Anija kishte ndaluar në disa porte, në një seri shtetesh përpara se të bëhej operacioni i policisë, me trafikantët që po përdornin gjënë e gjallë për ta fshehur ngarkesën.

“Grupet kriminale ndërkombëtare po shpikin mënyra të reja për të transportuar drogën nga Amerika Latine në Evropë, duke përdorur bagëtitë për ta bërë kontrollin dhe lokalizimin më të vështirë”, thuhet në një komunikate të policisë spanjolle.

Në të saktësohet se efektivët kanë arrestuar 28 anëtarët e ekuipazhit të anijes “Orion V” me flamur të Togos, që ishte nisur nga Kolumbia.

Kombësia e të arrestuarve nuk dihet ende, por autoritetet iberike kanë saktësuar se për ndalimin e ngarkesës u angazhua edhe Administrata amerikane e Antidrogës, DEA.

Oficerët e policisë shkarkuan një dyzinë kutish me kokainë në portin e Las Palmas, në ishullin Gran Kanaria.

LEXO GJITHASHTU:

• “Mushka” dhe “Noizy”, kodet e trafikantëve të drogës që zbuloi Guardia di Finanzia
• Zbardhen emrat, kush janë shqiptarët e goditur nga operacioni i SPAK dhe italianëve
• Megaoperacion në Itali dhe Shqipëri, arrestohen 43 persona. Sekuestrohen 4 milionë €