E Ngarkuara me Punë e SHBA takon ministrin Lamallari, zbardhen diskutimet

Ministri i Drejtësisë, Besfort Lamallari, priti në një takim të Ngarkuarën me Punë të Ambasadës së SHBA në Tiranë, Nancy VanHorn.

Zyra e shtypit e Ministrisë së Drejtësisë bëri me dije se temat kryesore të diskutimit ishin ecuria e zbatimit të reformës në drejtësi, sundimit të ligjit dhe forcimit të shtetit të së drejtës.

“Kënaqësi të prisja sot në takim të Ngarkuarën me Punë të Ambasadës së SHBA në Tiranë, znj. Nancy VanHorn. Diskutuam për ecurinë e zbatimit të reformës në drejtësi, sundimin e ligjit dhe forcimin e shtetit të së drejtës, për ta bërë të pakthyeshëm progresin e arritur deri më tani dhe për të garantuar anëtarësimin në BE brenda vitit 2030. Mbetemi të përkushtuar të forcojmë kapacitetet tona në institucionet e drejtësisë dhe sistemin penitenciar, si dhe të intensifikojmë bashkëpunimin dypalësh. Partneriteti strategjik me SHBA dhe mbështetja e vijueshme e tyre në shumë reforma kyçe, për ne kanë një vlerë të çmuar”, shkruan ministri Lamallari teksa publikon edhe foto nga takimi me të Ngarkuarën me Punë të SHBA në Tiranë.

Ambasada amerikane reagoi lidhur me takimin përmes një mesazhi të publikuar në faqen zyrtare në Facebook.

“Duke hapur rrugën për një bashkëpunim më të fortë në fusha me interes të ndërsjellë, sot e Ngarkuara me Punë Nancy VanHorn takoi Ministrin e Drejtësisë, Besfort Lamallari, në fillim të mandatit të tij të ri. Koordinimi i efektshëm me sistemin e drejtësisë penale në Shqipëri është kyç për çmontimin e krimit të organizuar dhe grupeve terroriste, një nga përparësitë kryesore të Administratës Trump”, thuhet në njoftimin e ambasadës s SHBA.

LEXONI GJITHASHTU:

• Lamallari prezanton planin 2025-2029: Sistemi digjital gjyqësor, prioriteti ynë
• Peleshi thërret krerët e grupeve parlamentare, në fokus komisionet e Kuvendit