Peleshi thërret krerët e grupeve parlamentare, në fokus komisionet e Kuvendit

Kryetari i Kuvendit, Niko Peleshi, ka thirrur sot në një takim krerët e grupeve parlamentare në prag të nisjes së sesionit të ri parlamentar.

Burime për Euronews Albania bëjnë me dije se në këtë takim po marrin pjesë Taulant Balla, Gazment Bardhi, Fatmir Mediu dhe Tedi Blushi.

Në qendër të diskutimeve është çështja e konstituimit të komisioneve parlamentare, një proces që ka mbetur pezull pas zhvillimeve të fundit politike, si dhe përgatitja e axhendës së punës për javën e ardhshme në Kuvend.

Takimi zhvillohet vetëm një ditë pas Konferencës së Kryetarëve, e cila nuk solli një dakordësi të plotë mes palëve, dhe vetëm një ditë përpara seancës plenare të nesërme, ku pritet të ketë zhvillime të rëndësishme.

Pritet që pas këtij takimi, të ketë më shumë qartësi mbi përbërjen dhe funksionimin e komisioneve, si dhe mbi rolin e opozitës në drejtimin e disa prej tyre, çështje që ka qenë objekt debati mes maxhorancës dhe opozitës në javët e fundit.

LEXONI GJITHASHTU:

• Balla thirrje opozitës: Sillni propozimet për komisionet, Bardhi duhet të ishte këtu
• Reagon Bardhi pas seancës: Diella nuk është vizion, por fasada virtuale e vjedhjeve