E rëndë në Britani, policia zbulon dhjetëra trupa në një pyll në Cornwall

Ekipet speciale kanë qenë duke kontrolluar prej disa muajsh pyllin Paramoor, pranë fshatit Sticker në Cornwall.

Më herët këtë muaj, ata zbuluan mbetjet e Daniel Coleman, 43 vjeç, dhe një burrë është tashmë i akuzuar për vrasjen e tij.

Coleman u zhduk muajin e kaluar nga qyteti St Austell dhe dyshohet se ka vdekur midis 2 qershorit dhe 7 korrikut.

Komisionerja e policisë dhe krimit, Alison Hernandez, i tha një paneli se gjatë hetimeve për vdekjen e tij janë zbuluar edhe trupa të tjerë.

“Kemi gjetur trupa të pajetë në atë pyll,” tha ajo.

“Tani po përpiqemi të përcaktojmë se sa trupa janë në të vërtetë, kush janë ata dhe çfarë mund t’u ketë ndodhur. Gjithashtu nuk e dimë se sa kohë kanë qenë aty, disa prej tyre.”

Zonja Hernandez tha se është dashur të kërkohet ndihmë shtesë për të përballuar hetimin.

“Disa nga aspektet e operacionit nuk mund t’i ndaj publikisht, por disa janë të dukshme,” shtoi ajo.

“Siç e dini, kemi të bëjmë me një skenë krimi të madhe në Cornwall, e cila kërkon përpjekje të mëdha për ta mbikëqyrur dhe siguruar.”

Ajo theksoi se është kërkuar ndihmë nga agjenci të tjera për shkak të natyrës së ndërlikuar të hetimeve:

“Agjencia Kombëtare e Krimit po mbështet hetimin aktualisht. Dua të falënderoj të gjitha forcat e tjera që kanë ardhur për të ofruar ndihmë, ndonëse janë shumë të ngarkuara në këtë periudhë. Kryesisht kemi kërkuar ndihmë hetimore.”

“Derisa të sqarohen plotësisht disa nga elementët e asaj që kemi gjetur atje, informacioni i plotë do të bëhet publik. E di që ka pasur informacione në media. Ne kemi ngritur një çadër të madhe forensike në vendngjarje.”

Daniel Coleman ishte raportuar i zhdukur më 1 qershor.

James Desborough, 39 vjeç, nga Lower Sticker, është akuzuar për vrasjen e tij.

Ai është paraqitur tashmë në Gjykatën Magjistrale të Bodmin dhe është mbajtur në paraburgim.

Pritet të dalë para Gjykatës së Lartë të Truros më 8 gusht.

Dhjetë ditë më parë, kur u pyet për raportimet mbi “trupa të shumtë” në zonën e kërkimeve, Policia e Devon dhe Cornwall tha se ishin duke punuar për nxjerrjen e trupit të Coleman dhe se hetimet forensike në vendngjarje lidhen me të.