Humbi kontrollin e motorit dhe ra në kanal, humb jetën punonjësi i FNSH në Shkodër

Efektivi Nikollë Lekndrejaj i FNSH ka humbur jetën mbrëmjen e djeshme teksa kthehej në shtëpi në fshatin Bardhaj. Lajmin e ka bërë të ditur për Euronews Albania, korrespondenti Teodor Gjerga.

Punonjësi i FNSH dyshohet se ka humbur kontrollin e motorit për pasojë të motit të keq dhe ka përfunduar në kanalin me ujë ku dhe ka humbur jetën.

Nikollë Lekndrejaj u gjet i vdekur në orët e para të mëngjesit gjatë kontrollit të kanalit që të çon në lumin Kir.

Burime nga policia thonë se ngjarja është aksidentale.

Njoftimi i policisë:

Rreth orës 02:50, në fshatin Bardhaj, shtetasi N. L., 51 vjeç, (punonjës policie i Forcës Kombëtare të Sigurisë, Njësia Shkodër, i cili ishte jashtë orarit të shërbimit), duke drejtuar motomjetin e tij, dyshohet se ka humbur kontrollin mbi drejtimin e motomjetit, si pasojë e motit të keq, dhe për pasojë motomjeti ka dalë nga rruga, duke rënë në një kanal me ujë.

Shtetasin N. L. e ka marrë rrjedha e ujit dhe për pasojë ka humbur jetën.

Shërbimet e Policisë, përgjatë orëve të mëngjesit, gjatë kontrollit të kanalit që të çon në lumin Kir, kanë bërë të mundur gjetjen e trupit të pajetë të 51-vjeçarit.

Grupi hetimor vijon punën për sqarimin e rrethanave dhe dokumentimin ligjor të këtij rasti.

LEXONI GJITHASHTU:

• Fushata e Trump: Ish-Presidenti u njoftua për kërcënimet e dyshuara nga Irani
• Presidenti Vuçiç në OKB: Nuk jemi shërbëtorë as të Rusisë, as të SHBA-së