“E tradhtoi telefoni”- Si u zbulua ish-i dashuri që vrau studenten shqiptare në Romë

Ilaria Sula, një studente shqiptare në Itali, u gjet e pajetë mëngjesin e kësaj të mërkure në një zonë pyjore afër komunës së Polit, rreth 40 kilometra larg Romës. Ajo ishte zhdukur më 25 mars. Trupi i saj u gjet i fshehur në një valixhe, i hedhur në fund të një gremine.

Hetimet e zhvilluara nga autoritetet italiane zbuluan se i dyshuari kryesor për vrasjen është i dashuri i saj, Mark Samson, një 23-vjeçar filipinas, i cili është arrestuar.

Samson dhe e reja shqiptare kishin krijuar një lidhje që kishte zgjatur rreth 1 vit, por që kishte përfunduar.

Sipas hetimeve, ngjarja ka ndodhur në apartamentin e Mark Samson në lagjen Africano të Romës, ku dyshohet se Ilaria është goditur disa herë me thikë, ndërsa pas vrasjes ai ka tentuar të fshehë trupin e saj. Ishte përdorimi i telefonit të Ilaria-s nga i dyshuari, çelësi që hetuesit të zbulonin krimin e rëndë.

Ish-i dashuri përdori telefonin e 22-vjeçares për të postuar mesazhe dhe për të krijuar iluzionin te familjarët dhe policia se ajo ishte ende gjallë. Ky veprim e vendosi Samson në qendër të hetimeve, ku tabulatet telefonike dhe gjurmët e vendndodhjes kanë ndihmuar për të zbardhur ngjarjen.

Ilaria ishte një studente në Fakultetin e Shkencave Statistike në Universitetin “La Sapienza” të Romës dhe jetonte me shoqet e saj në lagjen San Lorenzo. Mungesa e saj u raportua fillimisht nga shoqet dhe më pas nga familja, ku më datë 25 mars pasi u largua nga banesa, telefoni i saj rezultonte i fikur.

LEXONI GJITHASHTU:

• Ishte zhdukur në Romë, gjendet brenda një valixheje trupi i 22-vjeçares shqiptare
• Zbardhet vrasja e studentes shqiptare në Itali, arrestohet i dashuri filipinas