E zunë paranojat sa pa armët, detaje nga ngjarja në Astir: E reja ishte me 5 persona

Detaje të reja janë zbuluar mbi incidentin e ndodhur të enjten në zonën e Astirit, ku 21-vjeçarja Sajma Qordja alarmoi Policinë e Shtetit duke pretenduar se ishte dhunuar dhe po mbahej peng në një apartament në katin e tetë të një pallati pranë Unazës së Re.

Sipas deklaratës së saj para Oficerit të Policisë Gjyqësore, 21-vjeçarja u shpreh se ndjehej e rrezikuar pasi ndodhej në shoqërinë e pesë personave të tjerë, mes të cilëve tre djem dhe dy vajza. Sipas saj, të rinjtë kishin qëndruar së bashku në dy apartamente të marrë me qira nga një djalë me të cilin ajo frekuentohej. Të gjashtë personat kishin qëndruar së bashku duke filluar nga mbrëmja e së mërkurës deri në mesditën e së enjtes, kohë që dyshohet se kanë konsumuar dhe lëndë narkotike.

Sipas burimeve, mëngjesin e së enjtes pesë personat e tjerë kishin zbritur për të konsumuar kafe, duke e lënë 21-vjeçaren në gjumë. Kur ajo u zgjua, gjeti në apartament dy armë dhe një jelek antiplumb, çka e frikësoi rëndë dhe shkaktoi panik. E reja filloi të shfaqte paranoja dhe të ulërinte, gjë që tërhoqi vëmendjen e banorëve të pallatit.

Pas kësaj, ajo telefonoi nënën e saj, duke pretenduar se ishte mbajtur peng dhe ishte dhunuar gjatë gjithë natës nga disa persona. Familjarët e saj, të shqetësuar nga kjo thirrje, njoftuan Policinë e Shtetit, duke raportuar se vajza e tyre ishte rrëmbyer nga persona të armatosur dhe të rrezikshëm.

Fillimisht, ishin dy efektivë të forcave të rendit që shkuan në katin e tetë të pallatit në Astir për të verifikuar situatën, por 21 vjeçarja refuzoi të hapë derën, duke thënë se ndihej e frikësuar. Edhe babai i saj, i cili ndodhej pranë forcave të policisë, ka komunikuar me vajzën përmes telefonit me video-call, por ajo nuk ka hapur derën.

Më pas, janë njoftuar forca të tjera të policisë, të cilat kanë ndërhyrë për të hyrë në apartamentet, pasi situata po përkeqësohej. Pas lëvizjeve të forcave të rendit, pesë personat që shoqërohej vajza janë larguar nga zona.

Policia ka sekuestruar DVR-në e kamerave të sigurisë së pallatit dhe ka identifikuar të gjithë personat dhe lëvizjet e tyre që nga dita e parë e akomodimit në dy apartamentet deri te largimi pas mbërritjes së policisë. Pronari i apartamenteve është marrë në pyetje dhe ka pohuar se njëra prej banesave ishte marrë me qira që nga muaji nëntor.

Gjatë kontrollit të dy apartamenteve, policia ka gjetur dy pistoleta, një jelek antiplumb dhe ka konstatuar shenja të konsumimit të lëndëve narkotike. Hetimet janë në vazhdim për zbardhjen e plotë të ngjarjes.

LEXONI GJITHASHTU:

• Alarmi i dhënë nga vajza në Astir, Renea futet në banesë nga tarraca e pallatit
• Renea blindon Astirin, dyshohet se është marrë peng një vajzë