Edhe Kosova shpall ditë zie për vdekjen e shkrimtarit Ismail Kadare

Presidentja e Republikës së Kosovës, Vjosa Osmani, ka firmosur vendimin që e mërkura, 3 korrik 2024, të shpallet ditë zie shtetërore, në nderim shkrimtarit të mirënjohur Ismail Kadare.

Dita e zisë në Kosovë, përkon dhe me ditën kur në Tiranë do të mbahet ceremonia e varrimit të shkrimtarit.

Sipas një njoftimi për media nga Presidenca bëhet me dije se ngarkohet Protokolli i Shtetit që të ndërmarrë të gjitha veprimet e nevojshme për zbatimin e këtij vendimi.

Në qershor të vitit të kaluar, Osmani dekoroi shkrimtarin Ismail Kadare me Urdhrin “Hasan Prishtina”, ndër Urdhrat më të lartë të cilin e jep Republika e Kosovës për personalitetet e shquara.

Në muajin gusht autoritetet në Kosovë i dhanë shkrimtarit shqiptar nënshtetësinë e Republikës së Kosovës.

Kujtojmë se edhe Shqipëria ka shpallur dy ditë zie në nderim të Ismail Kadarasë, duke përfshirë këtë të martë dhe ditën e mërkurë kur pritet të mbahet dhe ceremonia e varrimit.