Ekspertët paralajmërojnë se Belgjika do përballet me epidemi të 3-fishtë këtë dimër 

Belgjika po përballet me një “epidemi të trefishtë” të mundshme këtë dimër, pasi një rritje e numrit të rasteve të koronavirusit, e kombinuar me një rritje të infeksioneve të rregullta sezonale të ftohjes dhe gripit, kërcënon të sforcojë shërbimin shëndetësor përtej kufijve të qëndrueshëm.

“Rreziku i një epidemie të trefishtë duke ushtruar presion të fortë në sistemin tonë shëndetësor është një realitet që duhet marrë parasysh”, tha Steven Van Gucht, kreu i departamentit të sëmundjeve virale në Institutin e Shëndetit Publik Sciensano, raporton Brussels Times.

Ekspertët rekomandojnë që masat paraprake të miratuara gjatë pandemisë, përfshirë mbajtjen e maskave, të rifuten përkohësisht për të kufizuar infeksionet dhe për të zvogëluar presionin mbi sistemin shëndetësor të Belgjikës.

“Do të jetë e nevojshme të rishikohet mbajtja e maskave në dhomat e pritjes së spitalit, së bashku me higjienën e rreptë të frymëmarrjes”, tha Van Gucht.

Drejtori i Institutit për Shëndetin Global me bazë në Gjenevë, Antoine Flaut, tha se kriza e këtij dimri mund t’i ngjajë situatës së vitit të kaluar, kur shumë spitale belge këshilluan pacientët të qëndrojnë larg dhomave të urgjencës nëse shfaqin simptoma të ngjashme me gripin.

“Probabiliteti i shfaqjes së epidemive të ndryshme dimërore në të njëjtën kohë është i lartë, gjë që çon në rrezikun e mbingarkesës së përkohshme të sistemit shëndetësor, veçanërisht spitaleve”, tha Flao.

Ai paralajmëroi për rrezikun e “lodhjes nga Covid” në mesin e popullatës evropiane, me shumë qytetarë që aktualisht nuk dëshirojnë të mbajnë maska ​​​​dhe të testohen për Covid.

LEXONI GJITHASHTU:

• Tregtonin veshje kontrabandë nga Belgjika, arrestohen dy persona në Tiranë
• Belgjika shkatërron 131 milionë euro pajisje anti-COVID, kanë dalë jashtë funksioni