Është çelur në galerinë “Zeta” ekspozita e artit bashkëkohor, “Petalet e panumërueshme” e cila do te qendroje e hapur per publikun deri me 5 Maj.
Është çelur në galerinë “Zeta” ekspozita e artit bashkëkohor, “Petalet e panumërueshme”. Kuratorët Markus Waitschacher (Vaitshaher) dhe Endri Dani kanë përzgjedhur 11 artistë, 6 shqiptarë dhe 5 austriakë përmes konceptit të luleve si gjenezë e natyrës.
Në këtë ekspozitë artistet shqiptare shfaqen përkrah artistëve austriakë, duke bashkuar breza, qasje e mediume artistike që përmes imazheve dhe koncepteve kërkojnë të rrisin ndërgjegjësimin për natyrën, duke e përjetësuar në vepra.
“kjo ekspozitë i kushtohet luleve. Fatmirësisht jemi ende të rrethuar prej tyre edhe pse ndonjëherë, lulet duhet të udhëtojnë gjysmën e planetit tonë për të qenë me ne, duke u pjalmuar nga pajisjet elektronike dhe duke vuajtur shumë nga sjellja jonë.
Një prej veprave tregon anët e ndryshme të luleve dhe parave. Kartëmonedhat janë të fshehura, sa duket vetëm dekorimi me lule. Të përdorura dhe të keqpërdorura nga pushtetet politike – në anën e pasme të tyre shohim ndër të tjera presidentë, ministra por edhe diktatorë, kolonizatorë dhe simbole politike, të ndërthurura”.
Të pranishëm në çeljen e ekspozitës ishin edhe ministrja austriake e Integrimit Karoline Edlstadler dhe ministri Austriak i Ekonomisë Martin Koher. Në fjalën e tyre ata folën për artin si urë bashkuese mes vendeve dhe pohuan mbështetjen për integrimin e Shqipërisë.
“Flasim gjithmonë për ekonominë, politikën, paqen, prosperitetin, por nuk duhet të harrojmë se mënyra më e vjetër për të mbushur hapësirat që na ndajnë janë arti dhe kultura’’
Ekspozita me vizatime, piktura, skulptura dhe video e cila çelet në kuadër të nismës austriake “të imagjinosh dinjitetin” e cila synon përmes artit të ndryshojë perceptimet, qasjet kundrejt natyrës, ambientit dhe ekosistemit do të qëndrojë e hapur për publikun deri me 5 Maj.
LEXONI GJITHASHTU:
- Fluks rezervimesh për pushime, fuqia punëtore vijon të jetë problem
- Paralajmërimet e Serbisë për të penguar Kosovën drejt KiE, reagon BE
