Ekzekutoi biznesmenin Edmond Papa, 44-vjeçari dyshohet të jetë larguar jashtë vendit

Prokuroria e Tiranës kërkon arrest me burg në mungesë ndaj Andrew Bode, i dyshuar të jetë ekzekutori i Edmond Papës  më 16 dhjetor në zonën e Selitës në Tiranë.

Togat e zeza pritet të vlerësojnë kërkesën e organit të akuzës dhe të vendosin nëse do të përcaktojnë të njëjtën masë apo jo.

Sipas të dhënave të sistemit TIMS, rezulton se 44-vjeçari ligjërisht nuk ka dalë nga territori shqiptar, por dyshohet se mund të jetë larguar në mënyrë ilegale nga vendi.

Në dosjen e Prokurorisë thuhet se Bode është i dyshuari kryesor si ekzekutor i biznesmenit Papa. Pamjet e kamerave të sigurisë së një biznesi në afërsi të vendit të ngjarjes kanë ndihmuar policinë për identifikimin e Bodes.

Andreë Bode tashmë është i shpallur në kërkim nga policia, nëse togat e zeza pranojnë kërkesën e prokurorisë për arrest me burg, automatikisht ai shpallet në kërkim ndërkombëtar.

Nga të dhënat e para të hetimeve, vrasja e biznesmenit Papa dyshohet të jetë bërë për hakmarrje, pas ekzekutimit me tritol në autostradën Tiranë- Elbasan të Aleksandër Sadikajt, mik i Bodes dhe Albano Velos.

Ky i fundit u arrestua më 1 Janar në Rinas teksa po kthehej nga Franca, por ka mohuar autorësinë e vrasjes. 30-vjeçari do të qëndrojë në burg deri në përfundim të hetimeve.

Gjithashtu po hetohet edhe ish-efektivi Dilaver Velo, babi i Albano Velos nëse e ka ndihmuar të birin apo ka pasur dijeni mbi ngjarjen.