Elbasan/ Dhunoi prindërit, arrestohet 34-vjeçari i shpallur në kërkim

Një 34-vjeçar në Elbasan i cili ishte shpallur në kërkim pasi dhunoi prindërit është arrestuar ditën e sotme në kuadër të operacionit policor të koduar ‘Befasi’.

“Më datë 05.05.2023, në fshatin Shushicë, shtetasi D. G., i cili ushtroi dhunë ndaj prindërve të tij dhe i kanosi ata me jetë, sapo konstatoi mbërritjen e shërbimeve të Policisë, doli nga banesa dhe u largua në terrenin e vështirë malor të fshatit, ku dyshohet se ka qëndruar i fshehur gjatë këtyre ditëve”- thuhet në njoftimin e policisë.

Pas ndërhyrjes nga Policia, gjatë kontrollit në banesë, u gjetën dhe sekuestruan 1 armë zjarri, 2 pako me lëndë të dyshuar dinamit, 1 kapsolle detonatore dhe municion luftarak, që dyshohet se i posedonte 34-vjeçari.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme.

LEXONI GJITHASHTU: 

• Humbi zgjedhjet lokale në Durrës, reagon për herë të parë Igli Cara
• Kërkoi lirimin nga qelia, GJKKO rrëzon ankimin e Ramazan Rrajës