Komunitetet e emigrantëve në Gjermani sa vjen e shqetësohen nga rritja e mbështetjes për të djathtën ekstreme, Alternativa për Gjermaninë në prag të zgjedhjeve.

Tre lande, Turingjia, Saksonia dhe Brandenburgu do të mbajnë zgjedhje në shtator dhe sondazhet tregojnë se AfD-ja kryeson.

Partia është e njohur për retorikën e ashpër anti-emigrantë, duke e kthyer emigracionin në një shqetësim kyç për votuesit në lindje të Gjermanisë.

“Mendoj se si e djathta ekstreme, konservatorët dhe forcat populiste autoritare, që po bëhen gjithnjë e më të forta këtu në Turingji, bartin një rrezik të madh. Me pak fjalë, ekziston rreziku se qasja e tyre përbën rrezik për normalizimin, se narrativa e tyre do të përhapet deri në qendër të shoqërisë dhe të bëhet çështje kryesore. Kjo më shqetëson shumë”, tha Doreen Denstaed, ministre e landit të Turingjisë për Emigracionin.

Daniel Egbe mori nënshtetësinë gjermane në 2003-shin, por druhet se kjo nuk do të mjaftojë nëse AfD vjen në pushtet.

“Ne ecim rrugës me frikë. Askush nuk do që partitë e ekstremit të djathtë të vijnë në pushtet, sidomos ato që flasin për emigracionin”, tha Daniel Egbe, themelues i shoqatës anti-diskriminim AMAH.

Debati për emigrantët është ashpërsuar pas sulmit me thikë në qytetin Solingen, për të cilin u arrestua një azilkërkues sirian, që duhet të ishte dëbuar nga vendi vitin e kaluar.

Kancelari Olaf Scholz reagoi ndaj ngjarjes duke premtuar masa më të rrepta dëbimi.

LEXONI GJITHASHTU:

• Zgjedhjet në SHBA, Kamala Harris pranon zyrtarisht nominimin nga demokratët
• Gjykata e Lartë e Venezuelës konfirmon fitoren e Maduros në zgjedhjet presidenciale