EMRI| Ekstradohet nga Spanja 33-vjeçari i dënuar për arsenal armësh e municionesh

Një 33-vjeçar i shpallur në kërkim nga policia për posedim të një arsenali armësh dhe municionesh është arrestuar në Barcelonë me qëllim ekstradimin drejt vendit tonë.

Si rezultat i koordinimit të informacioneve dhe punës operacionale ndërmjet shërbimeve të ZQK Interpol Tiranës dhe Interpol Madridit, u bë i mundur lokalizimi në Barcelonë, kapja dhe ekstradimi drejt vendit tonë, i shtetasit të shpallur në kërkim ndërkombëtar Edmir Vlashi alias Edmir Marku, 33 vjeç i lindur në Lezhë.

“I akuzuar si bashkëposedues i një arsenali të përbërë prej 6 armësh zjarri, 1 arme gjahu dhe lëndë plasëse, kapet në Barcelonë dhe ekstradohet drejt vendit tonë, 33-vjeçari i shpallur në kërkim në kuadër të megaoperacionit policor të koduar “Mataro”, të finalizuar nga Policia e Lezhës, në dhjetor të vitit 2021. Gjatë këtij megaoperacioni, u sekuestrua arsenali i armëve dhe shuma 88 900 euro e dyshuar e përfituar nga tregtimi i armëve, si dhe u vunë në pranga 3 shtetas, të afërm të 33-vjeçarit të ekstraduar nga Spanja”, bëri me dije policia.

Gjykata e Rrethit Gjyqësor Lezhë i ka caktuar 33-vjeçarit, masën e sigurisë “Arrest në burg”, për veprat penale “Mbajtja pa leje dhe prodhimi i armëve, armëve shpërthyese dhe i municionit” dhe “Pastrimi i produkteve të veprës penale ose veprimtarisë kriminale”.

Shtetasi Edmir Vlashi alias Edmir Marku iu dorëzua Drejtorisë së Përgjithshme të Burgjeve, me qëllim kryerjen e veprimeve të mëtejshme procedurale

LEXONI GJITHASHTU:

EMRI| Ekstradohet nga Franca i dënuari me 25-vite burg për vrasje

Gjykata e Elbasanit vendos të mos ekstradojë rusen Svetlana Timofoeva