EMRI/ Në kërkim ndërkombëtar për trafik narkotikësh, arrestohet shqiptari

Operacioni policor ndërkombëtar i koduar “The Wanted” vazhdon me sukses, duke mundësuar kapjen dhe ekstradimin e shtetasve të shpallur në kërkim ndërkombëtar.

Në këtë kuadër, një bashkëpunim i ngushtë mes Interpol Tiranës dhe Interpol Madridit ka çuar në arrestimin e një shtetasi shqiptar, i kërkuar për veprimtari kriminale në fushën e narkotikëve.

Si rezultat i shkëmbimit të informacionit mes dy agjencive ndërkombëtare, shtetasi shqiptar Juxhin Drazhi, 34 vjeç, u arrestua në Spanjë. Ai ishte shpallur në kërkim ndërkombëtar pasi Gjykata e Posaçme e Shkallës së Parë për Korrupsionin dhe Krimin e Organizuar, në Tiranë, i kishte caktuar masën e sigurisë “Arrest në burg” në prill të vitit 2025, për akuzat e “Trafikimit të lëndëve narkotike”, “Grupit të strukturuar kriminal” dhe “Kryerja e veprave penale nga grupi i strukturuar kriminal dhe organizata kriminale”.

Arrestimi i Juxhin Drazhit është një tjetër rezultat i rëndësishëm i operacionit ndërkombëtar, i cili synon të zbardhë dhe ndalojë veprimtaritë e grupeve kriminale që operojnë përtej kufijve të shtetit. Tani, është në proces finalizimi i ekstradimit të tij drejt Shqipërisë, për t’u përballur me drejtësinë.

LEXONI GJITHASHTU:

• Zjarr në Tragjas, flakët përhapen me shpejtësi për shkak të erës së fortë
• Operacioni anti-drogë, SPAK: Janë sekuestruar 17 ton kokainë dhe milona euro pasuri