GJKKO ka caktuar masën e sigurisë “Arrest me burg” për shtetasin Gentian Çollaku, i cili po hetohet nga SPAK për nxitje të veprave terroriste në Shqipëri.
Përmes një njoftimi zyrtar SPAK bën me dije se ka dyshime të arsyeshme të bazuara mbi prova se Çollaku ka kryer veprën penale “Nxitja, thirrja publike dhe propaganda për kryerjen e veprave me qëllime terroriste”.
Hetimi ka nisur nga SPAK në bashkëpunim me oficerët e policisë gjyqësore të Drejtorisë se Antiterrorit, të cilët i janë drejtuar Gjykatës së Posaçme të Shkallës së parë Për Korrupsionin dhe Krimin e Organizuar me kërkesë për caktimin e masës së sigurimit personal “arrest në burg’’.
Gjykata e Posaçme e Shkallës së parë Për Korrupsionin dhe Krimin e Organizuar me vendimin nr. 31 datë 11.04.2023 ka vendosur ndaj këtij të hetuari masën e sigurimit personal ‘’arrest në burg’’.
