Policia e Vlorës ka arrestuar autorin e vrasjes së biznesmenit të ndërtimit Armando Meshau në mesditen e kësaj të hëne.

Ai është shtetasi Rei Meta, 33-vjeç dhe banues në Tiranë, i cili është shoqëruar në ambientet e Policisë, për kryerjen e veprimeve të mëtejshme procedurale.

Ngjarja ndodhi rreth orës 11:45, në një qendër interneti, në lagjen “Hajro Çakërri”, të qytetit të Vlorës, ku gjatë një konflikti për motive të dobëta, ndërroi jetë për shkak të dhunës fizike 55-vjeçari.

Viktima ishte në një pikë interneti për të printuar dokumente dhe ka nisur të konfliktohet me 33-vjeçarin për shkak të mosmarrëveshjeve për një banesë.

Mësohet se brenda pikës së internetit Armando Meshau e ka ofenduar dhe i ka thënë 33-vjeçarit që “s’ke për ta marrë apartamentin”, duke përdorur edhe fjalë banale.

Konflikti më tej ka degjeneruar në përdorimin e dhunës fizike, ku personi tashmë i arrestuar nga policia e qëlloi dy herë me grusht në fytyrë, duke i shkaktuar vdekjen.

Policia dhe grupi hetimor ndodhen në vendngjarje dhe po punojnë për zbardhjen e rrethanave të ngjarjes.

LEXONI GJITHASHTU:

• EMRI| Kush është ndërtuesi që humbi jetën pas sherrit me grushte në Vlorë
• Sherr me sende të forta mes disa personave në Vlorë, 1 i vdekur