Erdogan e Putin takohen në Turkmenistan, thirrje për armëpushim të pjesshëm

Presidenti turk Rexhep Tajip Erdogan pati sot një takim me homologun e tij rus Vladimir Putin në kryeqytetin Ashgabat të Turkmenistanit, në kuadër të “Forumit Ndërkombëtar për Paqe dhe Siguri”.

Forumi u zhvillua me rastin e 30-vjetorit të “neutralitetit të përhershëm” të shpallur nga regjimi i vendit, dhe morën pjesë në të krerë të ndryshëm shtetesh, mes tyre Turqia, Rusia, si edhe presidenti i Iranit, Masud Pezeshkian.

Në takimin mes Putinit dhe Erdogan, i cili zgjati rreth një orë e gjysmë, ishin të pranishëm nga pala turke ministri i Jashtëm Hakan Fidan dhe ministri i Energjisë Alparslan Bayraktar, kreu i shërbimit sekret MIT Ibrahim Kalın, drejtori i Komunikimit të Presidencës Burhanettin Duran, këshilltari për Politikën e Jashtme dhe Sigurinë i presidentit Akif Çagatay Kılıç, si edhe nënkryetari i partisë në pushtet AKP Halit Yerebakan.

Presidenti i Turqisë i Rusisë vlerësuan nivelin e mirë të marrëdhënieve mes dy vendeve, shkëmbyen mendime mbi çështjen ukrainase dhe asetet e ngrira ruse, folën për projektin e centralit bërthamor në Akkuyu, ndërsa Erdogan e ftoi Putinin të vizitonte Turqinë.

Siç bëri të ditur presidenca turke, Erdogan i tha Putinit se zbatimi i një armëpushimi të pjesshëm në Ukrainë për objektet energjetike dhe portet mund të ishte i dobishëm.

LEXONI GJITHASHTU:

• “Ping-pong diplomatik” për Ukrainën, SHBA rrit presionin ndaj Zelenskyt
• Von der Leyen: Trump nuk duhet të ndërhyjë në demokracinë evropiane