Erla Mëhilli: Rritja e PD në Tiranë e pamjaftueshme për të sjellë përmbushjen e rezultatit

Ekspertja e komunikimit, Erla Mëhilli thotë se rezultati i sondazhit për Qarkun e Tiranës do të duhej që të reflektonte një ndryshim dhe e konsideron të pamjaftueshme rritjen e PD për të përmbysur rezultatin. Ajo shtoi se opozita duhet të kishte punuar më shumë sidomos në Tiranë, Durrës dhe Elbasan.

“Është një rritje e PD nga 41.7% në 43.4% por nuk është një rritje e mjaftueshme për të përmbysur rezultatin. Pra, PS pavarësisht konsumimit në pushet vazhdon të ruajë pozitat e veta. Tirana duhej t’i printe ndryshimit. Nëse Tirana nuk e reflekton këtë, është e vështirë që ta reflektojnë qarqet e tjera. Në Tiranë, Durrës dhe Elbasan opozita duhet të kishte bërë një punë më të madhe jo për të arritur barazimin por për ta tejkaluar”, tha znj. Mëshilli.

Duke evidentuar se ka përqindje të lartë të papërcaktuarve, gjithashtu ekspertja e komunikimit shtoi se partitë e vogla duke përmendur partinë e Jozefina Topallit dhe Astrit Patozit,  mund t’i prishin punë PD-së pasi do të marrin nga votat e saj.

“Janë parti që do të kafshojnë nga PD dhe nuk e di se sa punë do t’i prishin. Votat që do të marrin do t’i prishin punë”, tha ajo.

Erla Mëhilli shtoi nga ana tjetër se “sondazhet nuk arrijnë t’i kapin dot se si do të votojnë njerëzit për partitë e vogla” pasi  situata është e polarizuar dhe njerëzit e kanë të vështirë të shprehen për partitë e vogla.

Lexoni gjithashtu:

Parashikimi i rezultatit të zgjedhjeve për Tiranën, PD gëzon rritje, por pritet të kryesojë PS