Escobar: Asocacioni një moment do të bëhet, s’është marrëveshje mes Kurtit e Serbisë

I dërguari i SHBA-ve për Ballkanin Perëndimor, Gabriel Escobar, ka folur në lidhje me Asocacionin e komunave me shumicë serbe në Kosovë.

Në një intervistë të dhënë për The Pavlovic Today, Escobar e cilësoi asocacionin si bazën e normalizimit të marrëdhënieve me Serbinë.

Ai shtoi se marrëveshja nuk do të prek karakterin multietnik të Kosovës, apo integritetin territorial të saj, po theksoi se asocacioni do të bëhet pasi është nëj detyrim ligjor ekzistues.

Duke iu referuar kundërshtimit të kryeministrit Albin Kurti, Escobar tha se asocacioni do të zbatohet në një moment në Kosovë.

“Sido që të shkoni përpara nën patronazhin e dialogut të lehtësuar nga BE-ja, do të keni një Asociacion [të komunave me shumicë serbe]. Prandaj them gjithmonë se do të zbatohet në një moment. Pranon apo jo obligimin ligjor qeveria aktuale në Kosovë nuk është marrëveshje mes Kurtit dhe Serbisë. Është një marrëveshje mes Serbisë dhe Kosovës. Kjo është arsyeja pse unë vazhdoj të them se do të ndodhë. Do të jetë baza e marrëveshjes së normalizimit. Kjo as që diskutohet”, tha Escobar në një intervistë për Pavlovic Today.

“Para së gjithash, vizioni ynë ka qenë gjithmonë konsistent që nga pavarësia e tyre që Kosova do të jetë një vend i pavarur sovran, një demokraci multietnike brenda kufijve të saj aktualë. Ky është ende vizioni ynë. Tani, në kuadër të këtij konstrukti, tashmë ekziston një marrëveshje që është nënshkruar me Marrëveshjen e Brukselit për themelimin e Asociacionit të komunave me shumicë serbe. Është një detyrim ligjor ekzistues. Pra, kjo është arsyeja pse çdo marrëveshje e ardhshme do ta përfshijë atë, dhe e përfshin atë, propozimi aktual franko-gjerman e përfshin atë”, u shpreh ai.

Escobar tha se Asociacioni nuk duhet të shkel Kushtetutën e Kosovës, dhe se nuk do të jetë një model i Republikës Sërpska.

“Pra tani brenda këtij konstrukti, qëndrimi ynë është që duhet të jetë diçka që nuk e shkel Kushtetutën e Kosovës, sipas ligjeve të Kosovës, që nuk krijon probleme për funksionalitetin e Kosovës. Me fjalë të tjera, asnjë model i Republika Sërpska. Tani, ajo që bën, për mendimin tim, është se e ndihmon Kosovën të marrë përsipër shërbimet dhe çështjet që serbët në veri aktualisht kërkojnë nga Beogradi t’i bëjë – do të transferohej, të gjitha ato shërbime duhet të ofrohen nga Qeveria e Kosovës. Dhe nëse Serbia ka ndonjë zë në të, kjo duhet të bëhet në mënyrë transparente, dhe përsëri, sipas ligjeve të Kosovës. Pra, ky është vizioni ynë. Çfarë do të bënte kjo, do t’u ofronte këtyre komunave aftësinë për të koordinuar dhe krijuar ekonomi të shkallës për gjëra të tilla si arsimi, kujdesi shëndetësor—të gjitha në gjuhën serbe—heqja e mbeturinave, shërbimet e ambulancës, llojet e gjërave që komunat tashmë i bëjnë, por ato do të jenë në gjendje të koordinojnë ndërmjet tyre, për ta bërë atë të funksionojë. Njerëzit nuk duhet të ndiejnë ndonjë ndryshim në jetën e tyre ose ndonjë ndryshim negativ në jetën e tyre ndërsa ne ecim përpara në këtë drejtim”, përfundoi Escobar.