‘Është fatkeqësia e këtij brezi’, qytetarët të shqetësuar për përdorimin e kanabisit tek të rinjtë

Raporti i fundit i Prokurorisë së Përgjithshme mbi gjendjen e kriminalitetit në vend tregon se veprat penale për prodhimin dhe kultivimin e narkotikëve kanë shënuar rritje gjatë vitit 2020 me 17.8% krahasuar me një vit më parë.

Të dhënat flasin për shtim të përdoruesve të drogave, kryesisht kanabisit.

Përqindjen më të lartë e zënë të rinjtë. Qytetarët në zona të ndryshme të Tiranës thonë se e ndeshin shpesh këtë fenomen në lagjet e tyre apo pranë shkollave.

“Është shtuar shumë shumë, në çdo cep pallati shikon që e konsumojnë, madje ka edhe femra. Është fatkeqësia e këtij brezi”, u shpreh një qytetar.

“Gjëja më e gabuar, edukimi i keq i prindërve. Prindërit ju plotësojnë të gjitha kushtet”, tha një tjetër.

“Duhet të funksionojë shteti, të ketë një program për të rinjtë”,  theksoi një qytetare.

Ndërkaq, të dhënat e institutit të Shëndetit Publik tregojnë se ka pasur rënie të përdoruesve të alkoolit apo duhanit, por e kundërta ka ndodhur me përdoruesit e drogës. Përdoruesit e kanabisit janë rritur me 1.5 herë, ata te kokainës dy here dhe po kaq edhe përdoruesit e heroinës.

LEXONI GJITHASHTU:

• Europol: Bandat shqiptare lidhje të drejtpërdrejta me prodhuesit e kokainës në Amerikën Latine
• Raporti i BE-së për drogën, kokaina e sekuestruar ka arritur në sasi rekord