‘Është një alarm’, Sevim Arbana: Sa pak kemi ngelur dhe sa shumë gra vriten

Aktivistja për të Drejtat e Grave, Sevim Arbana e konsideron alarmante situatën në të cilën ndodhet Shqipëria dhe Kosova, në lidhje me vrasjet e grave.

Në emisionin “Review” në Euronews Albania, Arbana nënvizoi se 30% e shqiptarëve janë larguar nga vendi dhe shtoi se edhe me pakësimin e popullsisë, ende vriten shumë gra.

“Jam shumë e tronditur. Më vjen shumë keq, disa herë revoltohem edhe me veten, unë kam një jetë në këtë fushë. Të gjitha këto ngjarjet makabre. E kemi nisur me shumë ëndrra, eufori, idealizëm që shumë shpejt do ishim më mirë. Sot jemi më keq se ishim atëherë kur mendonim se ishim keq. Janë 8 gra të vrara në Shqipëri këtë vit.

Në çdo 8 mars dhe çdo 16 ditët kundër dhunës, kemi vrasje makabre të grave. Nuk di çfarë të them. Në Shqipëri, me kaq pak sa jemi ne. 30% e shqiptarëve kanë ikur, sa pak jemi mbetur ne, është alarm, duhet të bien boritë, që të vrasësh gruan, je në fund”, theksoi ajo.

Policia e Kosovës ka dhënë detaje të reja rreth ngjarjes së rëndë në Kosovë, ku Hamide Magashi u vra me armë zjarri nga ish-bashkëshorti Sokol Halili më 30 nëntor.

Mësohet se autori Sokol Halili u arratis në Davidovc të Shtimes. Pas lokalizimit të tij, policia fillimisht largoi anëtarët e familjes nga shtëpia, ndërsa i dyshuari nuk pranoi negocimin me policinë dhe qëlloi veten me pistoletë. Ai humbi menjëherë jetën.

Policia ka informuar se në vendin e ngjarjes është gjetur dhe konfiskuar një pistoletë me një karikator pa fishekë dhe një predhë.

LEXONI GJITHASHTU

• Vrasja e gruas shtatzanë, Daci: Jemi një shoqëri e sëmurë në shumë drejtime
• Ministri Sveçla: Pezullohen katër policë për rastin e vrasjes së gruas shtatzënë
• Si i dha fund jetës Sokol Halili, në banesë iu gjet edhe një predhë