Eurostat: Shqiptarët në krye për orët e punës, mesatarja tejkalon vendet e BE-së

Punonjësit në Shqipëri vazhdojnë të punojnë më shumë orë se mesatarja evropiane. Sipas të dhënave të Eurostat, në vitin 2025 mesatarja e javës së punës në Bashkimin Evropian ishte 35.9 orë, ndërsa në Shqipëri, sipas të dhënave të INSTAT, punonjësit punojnë mesatarisht 42.6 orë në javë, ose 6.7 orë më shumë.

Brenda Bashkimit Evropian, javën më të gjatë të punës e kanë punonjësit në Greqi, me 39.6 orë në javë, të ndjekur nga Bullgaria dhe Polonia me nga 38.7 orë, si dhe Lituania me 38.4 orë. Edhe këto vende, megjithatë, mbeten poshtë mesatares së regjistruar në Shqipëri.

Në krahun tjetër renditet Holanda, me javën më të shkurtër të punës, 31.9 orë, e ndjekur nga Danimarka dhe Gjermania me nga 33.9 orë, si dhe Austria me 34 orë. Diferenca mes Shqipërisë dhe Holandës arrin në mbi 10 orë pune në javë.

Të dhënat tregojnë se, krahasuar me vendet e Bashkimit Evropian, edhe pse Shqipëria nuk është pjesë e tij, punonjësit kalojnë më shumë kohë në vendin e punës, ndërkohë që mesatarja evropiane ka ardhur në rënie gjatë dekadës së fundit, duke zbritur nga 36.9 orë në vitin 2015 në 35.9 orë në vitin 2025.