Evis Kushi e paditi për shpifje, GJKKO shpall të pafajshme Albana Vokshin

GJKKO ka shpallur të pafajshme deputeten Albana Vokshi, e cila ishte paditur për shpifje nga ministrja e Arsimit, Evis Kushi.

Lajmin e ka bërë vet Vokshi në një deklaratë për mediat, ndërsa ka kërkuar dhe dorëheqjen e Kushit nga detyra.

Deputetja e ka cilësuar ministren si të degradimit të arsimit, ndërsa u ka bërë thirrje prindërve që të bashkohen me përpjekjet e opozitës për të shpëtuar të ardhmen.

“Gjykata më dha të drejtë. Më shpalli të pafajshme duke rrëzuar padinë e Evis Kushit. Ky është sinjali i parë i mirë që vjen nga drejtësia. Shpresoj të mos jetë rast i izoluar. Drejtësia të përballet me shantazhet dhe dhunën që ushtron pushteti. Shkatërrimi i arsimit është një nga krimet më të mëdha të qeverisë Rama. Shumë prindër nuk besojnë më te arsimi shqiptar. Përgjegjës për këtë janë Edi Rama dhe Evis Kushi.

Meqënëse nuk pres vendimmarrje nga Rama, sot i kërkoj Evis Kushit të japë dorëheqjen sot pasi është shkaktare e degradimit të arsimit. Duhet të shpëtojmë fëmijët e të ardhmen. Shkatërrimi i arsimit ka pasoja për të ardhmen e shoqërisë shqiptare ndaj duhet të bashkohemi për të ndalur këtë qeveri anti-shqiptare. Ftoj çdo prind që të bashkohet me përpjekjet tona për demokraci”, tha Vokshi.

Kushi e kishte paditur pas denoncimit që bëri Vokshi për shpërndarjen e tezave të provimit për mësuesit e arsimit parauniversitar. Sipas saj, teza e pyetjeve kishte dalë disa orë para provimit.

LEXONI GJITHASHTU: 

• Burg për 31-vjeçarin që sulmoi Sali Berishën
• Cilat janë pistat e prokurorisë për sulmin ndaj Sali Berishës?
• Reagon Kurti: Policia e Kosovës nuk është e orientuar kundër serbëve