Exit Poll-i, analistët: Roli i PSD-së dhe i procesit të numërimit do jetë vendimtar

Sipas Exit Poll-it të MRB për Euronews Albania, gara për formimin e qeverisë do të jetë shumë e ngjeshur dhe lidhur me këtë specialisti i zgjedhjeve, Blendi Çeka u shpreh se çdo gjë do e vendosë sistemi.

Pas analizës së tij, Çeka tha se do të marrë një rëndësi të jashtëzakonshme procesi i numërimit.

“Të gjitha këto shifra do thyhen nëpër qarqe për të kuptuar produktin në mandate. Kam përshtypjen se e gjitha varet nga sistemi dhe thyerja qark më qark.’’, deklaroi ai në “Vota e Shqipëtarëve” në Euronews Albania.

Ndërsa Neritan Sejamini u shpreh se një faktor shumë i rëndësishëm mund të jetë PSD, sepse mund të marrë 2 mandate, 1 në Tiranë dhe 1 në Shkodër.

“PSD-në, s’di si ta klasifikosh, opozitë apo mazhorancë, por në bilancin final do ketë një rol të konsiderueshëm, sepse rezultati pritet të jetë shumë i ngushtë. Do jetë situatë problematike, pasi fitorja do jetë jo e qartë.’’, tha në fjalën e tij Sejamini.