Rrogën e mjekëve dhe infermierëve që humbën jetën nga COVID-19 e përfitojnë fëmijët e tyre deri 18 vjeç

Mes 16 vendimeve të miratuara në mbledhjen e parë të qeverisë “Rama 3” ishte edhe projektligji për statusin e fëmijëve nën përkujdesin e republikës.

Sipas këtij projektligji, fëmijët e mjekëve dhe infermierëve që kanë humbur jetën nga COVID-19 për shkak të punës në spitalet COVID, do të marrin rrogën e prindërve të tyre deri 18 vjeç.

Kjo sipas kreut të qeverisë, është një masë e posaçme për një mbështetje financiare dinjitoze për fëmijët e individëve që kanë dhënë jetën për mbrojtjen interesave kombëtare apo në raste fatkeqësish natyrore në ndihmë të popullsisë.

“Përfitojnë të gjithë jetimët nën 18 vjeç nën kujdestari të një personi të shpallur Dëshmor i Atdheut. Fëmijë të mjekëve, infermierëve, apo personelit mbështetës që kanë humbur jetën shkak të COVID-19, marrë gjatë apo për shkak të kryerjes së detyrës në institucionet e specializuara, spitalet COVID. Personat që i përkasin kësaj kategorie do të trajtohen në mënyrë retroaktive dhe të gjithë këta fëmijë do të marrin rrogën e plotë të prindit deri në moshën 18 vjeç”, tha kreu i qeverisë.