‘Fëmijët mbyllin veshët nga sirenat’, ukrainasja tregon momente nga sulmet

Irina Romanova rrëfen nga Ukraina për Euronews Albania momentet e vështira gjatë ditëve të fundit nga bombardimet ruse në Kiev dhe qytete të tjera.

Romanova nënvizoi se sa më shumë raketa të nisë Rusia në Ukrainë, aq më të fortë bëhen vendasit kundrejt armikut.

“Situata është vështirë, bombardimet kanë filluar. Është një hakmarrje për urën e Krimesë. Krimeja është një pjesë e Ukrainës, nuk është se kemi qëlluar mbi tokën ruse. Sot njerëzit kanë një lloj urrejtje ndaj Rusisë dhe më të bashkuar jemi. Sa më shumë raketa të lëshojnë, aq më të fortë bëhemi ne. Ka edhe njerëz që po largohen, ka edhe nga ata që po kthehen. Ne tani dimë si të veprojmë, ku të strehohemi; është e frikshme se po vdesin njerëz përditë”, u shpreh ajo.

Romanova tregoi më tej se vendasit po përpiqen të mos bien në depresion, ndërkohë që më të prekurit dhe të dëshpëruarit nga kjo situatë janë fëmijët.

“Frika më e madhe është për fëmijët. Ti i çon fëmijët në shkollë dhe kopësht dhe nuk është e sigurt nëse do kthehen më. Fëmijët ishin duke luajtur në park kur dëgjuan sirenat. Fëmijët ukrainas mbyllin veshët, vrapojnë tek prindërit dhe qajnë”, u shpreh ajo e përlotur.

LEXONI GJITHASHTU:

• Liderët e G7-së sot takim virtual për sulmet ruse ndaj Ukrainës
• SHBA dënon sulmet ‘brutale’ ruse në Ukrainë